عايشه في شقة مصر الجديدة ومقدرتش تسيب اجواء القاهرة الدافية وتهرب للتجمع او زايد
شايفه ان الڤيلا واسعة عليها :
_هوايتي المفضلة اني ازرع … ولو شفت جنايني بشمر كُمي وانزل أساعده وآخر مره زرعت نخلة صغيره في حديقة أوتيل …
_اللي بيسعدني في بيتي هو الزرع البسيط زي الورد البلدي والقط جوتشي بلعب معاه واخلي بالي منه بقي عنده ٦ سنين يعني باعمارنا ٤٠ سنة …
بقي مكتئب زيي تشوفه تقول ده قط مي عايش مع واحد مبتخرجش من أوضتها … بنقعد نتأمل احنا الاتنين
_بطلت اطبخ … عاوز مزاج ..ولازم تعمل الاكل لحد بتحبه … كنت بعمله لوالدتي …
_حتي التصوير مكنتش بالروقان ان ألبس واقف واتصور
_متجاوزتش رحيل والدتي … محدش بينسي أهله
وأوضحت الفنانة مي عزالدين خلال تصريحات تلفزيونية أنها لم تتزوج حتى الآن بسبب عدم لقاء شريك الحياة المناسب الذي يتوافق مع المواصفات التي تبحث عنها، مشيرة إلى إيمانها العميق بأن كل إنسان له نصيبه المحدَّد من الرزق، معبرة عن رضاها بنصيبها الذي تجسده الشهرة والنجاح وحب الجمهور.
وأكدت عزالدين أنها لا تندم على أي من تجاربها السابقة، معتبرة أن الوقت كشف لها أن تلك العلاقات لم تكن مناسبة ولم تكن ستُكلَّل بالنجاح
مي صوره لجيل التمانينات اللي مش قادر يعاصر مستجدات الحياة …حتي في مكياچها ولبسها
تمثل كتيير مننا حزنها عميق … تعلقها قوي … بتميل لبساطة الحياة …
حتي لما دخلت مجال عاوز جرأة وقلب منفتح علي العالم
مش عارفه تسيب شقتها بمصر الجديدة وتنقل ڤيلا بالتجمع وكان كل حياتها مامتها …
بتحب الزرع والورد وبتقضي فيه وقتها .. بتحب الحيوانات
بسيطة في لقائتها وأسلوبها … مبتحاولش تتصنع بكلامها ولا إنجليزي بلا هدف
بتحكي ازاي لما تشوف جنايني بتشمر كُمها وبتنزل تساعده لا مشية مشاهير ولا برستيچ …
اول سنة تروح الساحل اللي بتعتبره عدوها … هي بتبعد عن الزحمة ..ولما راحت مخرجتش من الأوتيل … لا تسهر ولا تعيش أجوائه
قعدت تلعب مع ابن اختها …
لسه بتحاول تتخطي رحيل والدتها .. اللي زي ما قالت محدش بينسي أهله …
مي رمز لجيل بنات اتربي في بيئة دافية أصحابها كلهم كانوا أمها … مش عارفه تندمج مع المجتمع الجديد والحداثة …
محبوبة لانها لسه بنت جيل نيللي وعم فؤاد والقناة الاولي والتانية وأفلام الأبيض واسود … ومسلسل الساعة ٨
ولا اسرار وحياة خاصة …ولا سفر واستعراض …حتي وهي فنانة بكامل شهرتها …محافظه علي كونها شبهنا …
تعليقات
إرسال تعليق